Sá fáheyrði atburður gerðist hér á Suðureyri nú í vor að nýliði hóf útgerð í hinu margrómaða strandveiðikerfi.  Það er Jóhann Daníelsson verkstjóri hjá Klofningi sem keypti sér gamlan Færeying með tveimur Elliðarúllum og skellti sér á skak. Afli hjá strandveiðibátum hefur verið tregur hér vestra fyrstu dagana, en glæðist vonandi með hækkandi sól.

Fyrirtækið Sæstál hér á Suðureyri hefur í nokkur ár hannað og smíðað línuspil, beitningatrektar og uppstokkara í báta. Aðallega hefur verið horft á minni línubáta undir 15 tonnum. Það er Guðmundur Karvel Pálsson sem hannar og smíðar þennan búnað. Þetta hófst allt á því að hann smíðaði útbúnað í eigin báta sem hann hefur gert út frá Noregi síðustu ár ásamt syni sínum. Talsverð reynsla er því komin á þetta og hefur þetta komið mjög vel út.  Nú síðustu daga hefur verið unnið að uppsetningu á búnaði í Flateyrarbátinn Stjána Ebba ÍS en áður hafði samskonar búnaður farið í annan Flateyrarbát Garðar ÍS. 

Trefjar í Hafnarfirði eru að ljúka smíði á plastbát sem fer til fyrirtækis sem starfar í rannsóknum í norska olíuiðnaðinum. Þessi bátur sem er mjög ólíkur öðrum bátum Trefja hingað til mun verða notaður til viðgerða á köplum sem notaðir eru til að rannsaka setlög í botni olíusvæða. Báturinn er með öflugum Jet drifbúnaði og nær 30 sm hraða. Báturinn var settur á flot og prufaður um daginn og þá náði Magnús Jónsson þessum myndum fyrir síðuna. Ekki fékkst leyfi til að mynda inni í bátnum, en ekkert mál að mynda hann af bryggjunni. Eins og sést er hann með öfluga stuðpúða allan hringinn og mun væntanlega eitthvað mæða á þessum þegar hann kemur í norðursjóinn.

Ívetur hafa farið fram umtalsverðar breytingar á þessum bát. Búið er að slá honum út að aftan til að auka flot í honum. Þá var sett önnur og mun stærri vél í hann. Nýtt rafmagn og eitthvað fleira var einnig gert. Gunnlaugur Gunnlaugsson eigandi bátsins var að prufu sigla honum í gærmorgun á pollinum og um sundin þegar ég var að rúnta á bryggjunni. Hann fer svo á strandveiðar þegar þær hefjast á slaginu 2. maí.

Nú eru strákarnir á Fríðu Dagmar búnir að róa henni í rúman mánuð. Ekki hef ég heyrt annað en að hún hafi komið vel út í þessum legum. Það styttist í að annar svona bátur komi til Bolungavíkur því nú er verið að leggja lokahönd á  nýjan Hrólf Einarsson ÍS. Eins hafa heyrst raddir um að þeir kunni hugsanlega að verða enn fleiri en þessir tveir. Nú er steinbítsvertíðin í fullum gangi hér fyrir vestan og lítið annað að hafa. Það er helst á smá bletti á Skálavíkinni sem hann er að gefa sig til eins og undanfarnar vertíðir. Eins hafa bátarnir verið að róa bæði austur og vestur fyrir í leit að meiri afla, allt frá svæðinu út af Blakknum og alla leið austur fyrir Horn.

Hér koma myndir af tveimur mönnum sem báðir eru látnir. Vagn Margeir Hrólfsson skipstjóri á Hauki ÍS fórst ásamt tengdasyni sínum í róðri 18. desember 1990. Aggi var alltmúligt maður eins og sagt er um menn sem geta gert alla hluti. Hann spilaði á nikku og var hrókur alls fagnaðar. Hann klippti fólk og lagði fyrir það teppi ef svo bar undir. Hann gerði svo alltaf út Haukinn frá því ég man eftir mér, á rækju og línu á veturna og sigldi með ferðamenn á sumrin. Óskar Hálfdánsson réri með Agga og eru þessar myndir frá þeim árum. Óskar var einn besti og heiðarlegasti maður sem ég hef kynnst um æfina. Við störfuðum saman í Björgunarsveitinni í Bolungavík. Óskar tók okkur ungu mönnunum alltaf sem jafningjum þótt hann væri mun eldri og reyndari. Hann kenndi okkur margt í þeim verkefnum sem sveitin tók að sér sem maður býr enn að í dag. Óskar hafði líka góðan húmor og  gaman var að vera með honum, hvort sem var í dósatalningu eða á ferðalögum. Óskar lést fyrir nokkrum árum. Hálfdán sonur Óskars byrjaði ungur að fara með þeim á sjóinn og eru þessar frábæru myndir frá honum.