Nú er unnið að því í  Reykjavíkurhöfn að koma andveltitanki fyrir á togaranum Venusi sem HB-Grandi gerir út. Skipið var í slipp þar sem það var málað og yfirfarið. Venus er eitt af spánarskipunum svokölluðu og hefur honum verið breytt töluvert frá því hann kom nýr til Hafnarfjarðar sem Júní GK 345 þann 3. júní 1973.

Árið 1992 fór ég að læra bifvélavirkjun hjá Jóni Guðbjartssyni heima í Bolungarvík. Jón og Guðbjartur sonur hans voru þá nýbúnir að kaupa 57 tonna togbát sem fékk nafnið Gunnbjörn ÍS 302. Baddi var skipstjórinn og Jón útgerðarstjórinn. Við á verkstæðinu sáum um ýmislegt sem gera þurfti hjá útgerðinni, allt frá því að landa afla uppí að rífa gírinn frá til að skipta um kúplingslegu.

Útgerðarfyrirtækið Lotna ehf sem gerir m.a. út frá Flateyri hefur fest kaup á yfirbyggðum Cleopatra bát frá Fuglafirði í Færeyjum. Báturinn var smíðaður hjá Trefjum seint á síðustu öld og seldur úr landi, en er nú kominn á Íslenska skrá í fyrsta skipti. Held að það sé rétt hjá mér að engin Cleopatra 28 sé yfirbyggð hér á landi heldur aðeins 38 bátarnir.

Á skipasíðu nokkurri þar sem fróðleikur er einkunarorðið er nú boðið uppá frétt um Danska uppsjávarskipið Gitte Henning.L 349. Þar er mynd af skipi sem sagt er vera núverandi Gitte Henning smíðuð 2008. Það er ekki rétt því myndin er af þar síðasta skipi sem bar það nafn. Það skip heitir nú Veronica D 95 og er skráð á Írlandi. Nýja skipið sem er jú frá 2008 er hins vegar mun stærra en það sem sést á téðri mynd. Fréttin sem er úr fiskifréttum segir hins vegar frá því að nú eigi að endurnýja Gitte enn á ný og verði nýsmíðin stærsta fiskiskip dana.

Hér eru myndir af hafrannsóknarskipinu Árna Friðríkssyni RE þar sem hann er að leggja úr höfn til loðnuleitar í síðustu viku. Erfiðlega gékk í lok síðasta árs að finna loðnu í veiðanlegu magni. Þar hafði veður mikil áhrif á leitina og lágu mörg skip m.a. inni á Ísafirði í 3 sólarhringa vegna brælu. Nú hefur loðnan hins vegar fundist fyrir austan land og eru skipin byrjuð að moka henni upp.

Þessir þrír meistarar setja mikinn svip á lífið á bryggjunni og skúrunum á Ísafirði. Óli á Árbæ er elstur þeirra félaga og rær enn uppá kraft á færi á bát sínum Guðna ÍS. Í fyrra réri hann einnig á grásleppu. Hann er í kringum nírætt. Óli á Gjögri er skemmtilegur kall sem lætur sig ekki vanta þegar málin eru rædd. Hann hefur vetursetu á Ísafirði en rær frá Gjögri á skak á sumrin á bát sínum Ölver ST 15. Hann er á áttræðisaldri. Óli málari, oft kallaður Óli á Bárunni er sá þriðji en hann gerði um árabil út Báru ÍS 66 en er nú skakari á bát sínum Óla Málara ÍS. Hann á einnig skúrinn Ólakaffi þar sem oft er margt um manninn enda alltaf veisla með kaffinu, nýbakað frá frúnni.

Hér koma fleiri myndir af Orranum þar sem hann er á síldveiðum í Norðursjónum. Þarna er verið að salta um borð og hefur örugglega verið mikið umstang við alla þessa kassa. Kannski að einhver geti upplýst okkur unglingana hvernig var unnið í þessa kassa.