Hér eru tveir að koma fullir til löndunar á sumarsíldveiðum 1961. Ingiber Ólafsson var smíðaður á Ísafirði 1961 og er væntanlega splúnkunýr þegar þessi mynd er tekin. Sæfari er smíðaður í Þýskalandi 1960 og var einn af mörgum systurskipum sem komu til landsins. Hann fórst í róðri á Barðagrunni 9. janúar 1970 með allri áhöfn 6 mönnum.

Nýlega voru fréttir af tveimur metlöndunum hjá skuttogaranum Stefni ÍS 28. Þá var verið að tala um aflaverðmæti eins og gjarnan er raunin í dag. Þessar myndir sýna hins vegar góð aflabrögð hjá sama skipi sem þá hét Gyllir ÍS 261 frá Flateyri. Skipstjórar á Gylli þá eru enn á fullu stími, annar þeirra er Grétar Kristjánsson frændi minn frá Súðavík sem er skipstjóri á frystiskipinu Gnúp GK frá Grindavík. Hinn er Páll Halldórsson skipstjóri á Páli Pálssyni ÍS.

Þetta er Gyllir ÍS 261 frá Flateyri. Myndirnar eru teknar í Þýskalandi árið 1986 þar sem hann var í vélarupptekt. Einnig var settur skrúfuhringur á hann. Svo var skipt um hálfan toggálgann, byggt yfir ganga og settur nýr dekk krani.

Árið 2000 fór skipið svo aftur út og þá var það lengt enn meira, hækkað og sett ný brú á það ásamt nýrri vél og öllu tilheyrandi. Það má því segja að 1686 sem nú heitir Valbjörn ÍS 307 sé nánast allt annað skip en það var í upphafi.

En eins og glöggir lesendur hafa séð var skipt um nafn á skipinu og ástæðan var sú að árið 2007 kaupa þeir feðgar gamla Framnesið ÍS af Hraðfrystihúsinu-Gunnvör í Hnífsdal og fær það nafnið Gunnbjörn ÍS 302. Gamli Gunnbjörn fékk skráninguna ÍS 307 en hélt nafninu fyrst í stað, en fékk svo nafnið Valbjörn ÍS 307.

Bæði skipin voru gerð út á bolfiskveiðar þar sem rækjuveiðar höfðu legið niðri að mestu leyti í nokkur ár. En þegar rækjan fór að veiðast aftur voru skipin fljótlega komin á rækju. Þeir feðgar kaupa svo þrotabú rækjuverksmiðjunnar Miðfells á Ísafirði og leggja skipin upp þar hjá nýja fyrirtækinu sem fékk nafnið Kampi. Skömmu fyrir síðustu jól bættist svo nýtt skip við sem er í eigu Birnir ehf og Kampa ehf og fékk það nafnið Ísbjörn ÍS 304 og er 1000 tonna rækjufrystiskip. Skipið er væntanlegt til heimahafnar á Ísafirði fljótlega og mun halda á rækjuveiðar í febrúar. Það er því óhætt að segja að útgerð þeirra feðga hafi stækkað úr 57 tonnum í tæp 2000 á 20 árum.

Magnús Jónsson var á höfninni í Reykjavík 2. janúar s.l. þegar skip voru að legja upp í fyrstu veiðiferð ársins 2012.

Hér koma tveir bræður sem eiga það sameiginlegt að hafa komið nýjir til Vestfjarða frá Noregi þar sem þeir voru smíðaðir. Þessi skip voru smíðuðí Flekkefjord og komu 6 eins skip til Vestfjarða. Þau voru Bessi ÍS til Súðavíkur, Framnes ÍS til Þingeyrar, Gyllir ÍS til Flateyrar og svo Guðbjörg ÍS, Guðbjartur ÍS og Júlíus Geirmundsson ÍS til Ísafjarðar. Júlíus var fyrstur af þessum skipum, og fyrsti skuttogari Ísfirðinga og kom 5 desember 1972 til Ísafjarðar. Það verða því 40 ár í vetur frá komu hans. 

1285. Hét nýr Júlíus Geirmundsson ÍS 270 og var gerður út frá Ísafirði til fram til 1979 er hann var settur upp í nýjan Júlla og seldur til Noregs aftur. En mánuði seinna var hann aftur seldur til Íslands og í þetta skiptið til Keflavíkur þar sem hann fékk nafnið Bergvík KE 22. Hann var svo seldur til Sauðárkróks og fékk þá nafnið Skagfirðingur SK 4 sem hann ber á þessari mynd. Það var svo fyrir 20 árum sem hann var seldur til Noregs í annað skiptið, eða 1992. 

1451. Hét nýr Gyllir ÍS 261 og kom nýr til Flateyrar 1976 og var gerður þar út þar til han var seldur á Ísafjörð, og er enn í fullri drift hér fyrir vestan og heitir Stefnir ÍS 28 og er gerður út af Hraðfrystihúsinu-Gunnvöru Hf.

Hér eru nokkrar skemmtilegar myndir. Páll Pálsson verður 40 ára á þessu ári eins og síðuhaldari. Hann hefur fengið andlitslyftingu eins og flestir vita. Í þeim breytingum var m.a. sett pera á skipið og sést munurinn á þessum myndum.